Aktorja katalanase Úrsula Corberó, e cila ka fituar famë për rolin e saj si "Tokio" në serialin e njohur "Money Heist", ka bërë një njoftim emocionues për ndjekësit e saj në rrjetet sociale. Ajo ka zbuluar se është në pritje të fëmijës së saj të parë me partnerin, aktorin dhe producentin argjentinas Chino Darín. Në postimin e saj, Corberó theksoi se “kjo nuk është inteligjencë artificiale”, duke shoqëruar mesazhin me simbole gëzimi dhe emocion. Publikimi i saj ka marrë mijëra pëlqime në pak minuta. Çifti është në një lidhje që prej vitit 2015, kur u takuan gjatë xhirimeve të serialit "La Embajada". Historia e tyre e dashurisë është ndjekur me shumë interes nga fansat, të cilët i konsiderojnë si një nga çiftet më tërheqëse të kinemasë hispanike. Lajmi për shtatzëninë e Corberó ka shpërthyer në reagime pozitive dhe urime nga publiku, duke u bërë një nga temat më të diskutuara në mediat sociale.
