Investimet e SHBA në infrastrukturën britanike të IA arrijnë miliarda dollarë

Në kuadër të vizitës së Presidentit amerikan Donald Trump në Britaninë e Madhe, një grup kompanish teknologjike amerikane, përfshirë Microsoft, kanë bërë të ditur se do të investojnë miliarda dollarë në infrastrukturën britanike të inteligjencës artificiale. Microsoft ka njoftuar se do të alokojë 30 miliardë dollarë gjatë katër viteve të ardhshme, me një fokus të veçantë në cloud computing dhe zhvillimin e infrastrukturës së inteligjencës artificiale.

Presidenti Trump arriti në Britani të martën për vizitën e tij të dytë shtetërore, ku të dy vendet planifikojnë të nënshkruajnë marrëveshje investimi dhe të forcojnë marrëdhëniet e tyre tradicionale. Satya Nadella, Drejtori Ekzekutiv i Microsoft, theksoi se qëllimi i investimeve është krijimi i mundësive për individë dhe biznese në të dy anët e Atlantikut, duke siguruar një partneritet të besueshëm teknologjik për Mbretërinë e Bashkuar.

Brad Smith, president i Microsoft, vuri në dukje përmirësimin e marrëdhënieve mes dy vendeve, duke e lidhur këtë me tërheqjen e kundërshtimit nga autoriteti britanik për blerjen e Activision Blizzard. Një tjetër projekt i rëndësishëm është iniciativa “Stargate”, që do të sjellë në Britani një version të infrastrukturës së IA-së, në bashkëpunim me Nscale, OpenAI dhe Nvidia. Kjo iniciativë parashikon instalimin e 120,000 gjysëmpërçuesve kompjuterikë shumë modernë në Britani, duke e pozicionuar atë si një qendër të rëndësishme për prodhimin e inteligjencës artificiale në Evropë.

Investimet e planifikuara, që arrijnë në 42 miliardë dollarë, janë pjesë e "Marrëveshjes për Mirëqënie teknologjike", e cila synon të zhvillojë modele të inteligjencës artificiale për sektorin e shëndetësisë, të avancojë teknologjitë e informatikës kuantike dhe të forcojë projektet bërthamore civile. Këto përpjekje do të kontribuojnë në rritjen ekonomike, kërkimin shkencor dhe sigurinë energjetike në të dy vendet.