Artina Hasani, një emër i njohur në Federatën e Basketbollit të Kosovës, ka marrë pjesë si anëtare e Komitetit Lokal Organizativ (LOC) në EuroBasket, ngjarja më e rëndësishme e basketbollit në Evropë. Ky angazhim është rezultat i një bashkëpunimi mes Federatës së Basketbollit të Kosovës dhe asaj të Qipros. Në rolin e saj si menaxhere e eventeve, Hasani ka luajtur një rol kyç në organizimin e garës, duke u fokusuar në menaxhimin e aktiviteteve brenda palestrës.
Pjesë e detyrave të saj ka qenë koordinimi i fushës, menaxhimi i vullnetarëve në dhomat e zhveshjes, si dhe organizimi i punës me gjyqtarët dhe zyrtarët e ndeshjeve. EuroBasket ka mirëpritur disa nga ekipet më të njohura evropiane, përfshirë Greqinë, Spanjën, Qipron, Italinë dhe Bosnjën e Hercegovinës. Gjatë këtij eventi, Artina ka pasur mundësinë të takojë disa nga yjet më të njohur të basketbollit botëror, si Giannis Antetokounmpo dhe Jusuf Nurkić, duke e pasuruar kështu përvojën e saj profesionale.
Kjo është hera e parë që Hasani angazhohet në organizimin e një eventi të tillë ndërkombëtar, një hap i rëndësishëm për promovimin e Federatës së Basketbollit të Kosovës në arenën evropiane. Angazhimi i saj tregon përkushtimin dhe profesionalizmin që karakterizon këtë federatë në zhvillimin e sportit të basketbollit.
