Pikat kryesore
- Kryeministri Edi Rama ka folur në podkastin “Flasim” edhe për programin kombëtar “Paketa e Maleve”, duke e cilësuar si një mundësi të re për zhvillimin rural dhe turizmin malor.
- Ai tha se ky program po zgjon interes të madh, veçanërisht nga shqiptarët jashtë vendit, të cilët tashmë po e shohin Shqipërinë si vend për të investuar kursimet e tyre.
- Ai theksoi se investimi mund të nisë edhe pa titullin përfundimtar të pronësisë, ndërsa 500 të parët që marrin leje për të filluar punën do të përjashtohen për 10 vjet nga taksat.
Kryeministri Edi Rama ka folur në podkastin “Flasim” edhe për programin kombëtar “Paketa e Maleve”, duke e cilësuar si një mundësi të re për zhvillimin rural dhe turizmin malor. Ai tha se ky program po zgjon interes të madh, veçanërisht nga shqiptarët jashtë vendit, të cilët tashmë po e shohin Shqipërinë si vend për të investuar kursimet e tyre. Ai theksoi se investimi mund të nisë edhe pa titullin përfundimtar të pronësisë, ndërsa 500 të parët që marrin leje për të filluar punën do të përjashtohen për 10 vjet nga taksat. Kryeministri ftoi qytetarët të shfrytëzojnë këtë mundësi. “Paketa e maleve po hap një rrugë të re në zhvillimin rural dhe po krijon premisat për një vlerë të shtuar, për një motor të ri në industrinë e turizmit tonë, duke i dhënë maleve, duke i dhënë Shqipërisë malore një përmasë të re, përmes kthimit të tokës dhe të shtëpive të gjyshërve në instrumente të zhvillimit dhe në mundësi të reja reale për të krijuar sipërmarrje dhe për të krijuar të ardhura, pa diskutim, më të larta sesa ato që mund të krijohen duke punuar për të tjerët jashtë vendit. Procesi është bërë i thjeshtë, është bërë i aksesueshëm. Investimi mund të nisë pa titullin përfundimtar të pronësisë. Për këtë është krijuar paketa e maleve, për të adresuar edhe një problematikë të mbartur nga vitet në territore të mrekullueshme ku pronarët legjitimë nuk gëzojnë titujt e pronësisë sepse nuk e kanë pranuar ligjin 7501 dhe ndërkohë nuk kanë konflikte mes tyre. Dhe përmes investimit ata do të mund të sigurohen se në fund të procesit, ku do të kenë edhe lehtësira domethënëse fiskale, për shembull, 500 të parët që do të marrin lejen për të filluar punën do të përjashtohen për 10 vjet nga taksat, ata do të kenë edhe titullin e pronësisë. Kështu që, për të gjithë ata që më dëgjojnë dhe që janë të interesuar apo janë të dyzuar apo janë dyshues, provoni paketën e maleve. Provoni paketën e maleve!”, tha Rama. Pas këtij programi, Rama njoftoi edhe nisjen e një nisme të re: “Dyfisho ndërmarrjen tënde”, e cila do të realizohet në bashkëpunim me Bankën e Shqipërisë dhe bankat e nivelit të dytë. Programi synon të mbështesë ndërmarrjet e vogla dhe të mesme përmes kredive me interesa më të ulëta dhe garanci nga qeveria. “Një program i fuqishëm kreditimi me interesa më të arsyeshme sesa ato komerciale të bankave të nivelit të dytë dhe me garanci nga qeveria e Shqipërisë, po bëhet më në fund gati për t’i shërbyer të gjithë atyre shqiptarëve dhe shqiptareve që me kurajë, me vullnet, por edhe me largpamësi kanë zgjedhur të hapin rrugën përmes sipërmarrjes; kanë zgjedhur të krijojnë një biznes të vogël i cili tanimë është gati të rritet, por ka nevojë për mbështetjen financiare që përndryshe ata nuk mund ta sigurojnë dot. Kjo është një rrugë e re dhe së shpejti, të gjithë ata që kanë një ndërmarrje të vogël apo të mesme, të gjithë ata që kanë një pikë prodhimi, që duan ta dyfishojnë dhe ta rrisin, të gjithë ata që kanë një start-up dhe që duan ta transformojnë në një ndërmarrje prodhuese, fitimprurëse, do të kenë të hapur derën e programit “Dyfisho ndërmarrjen tënde”, tha ai.
