Pas humbjes së thellë përballë Zvicrës, trajneri i kombëtares së Kosovës, Franco Foda, përballet me një sfidë të re para ndeshjes me Suedinë. Lajmi i keq ka ardhur për ekipin, pasi mbrojtësi Amir Rrahmani, një nga lojtarët më të rëndësishëm të grupit, ka pësuar një dëmtim dhe nuk do të jetë në dispozicion për këtë takim. Federata Kosovare e Futbollit ka konfirmuar se 31-vjeçari i Napolit do të mungojë, duke e vështirësuar akoma më shumë situatën për “Dardanët”. Nëse ekipi pëson një tjetër humbje, shanset për kualifikim do të reduktohen ndjeshëm pas vetëm dy ndeshjesh. Ndeshja e radhës do të zhvillohet nesër në stadiumin “Fadil Vokrri”, ku Vedat Muriqi dhe shokët e tij do të kërkojnë të rikthejnë besimin e tifozëve.
