Rafael Grossi, drejtori i Agjencisë Ndërkombëtare për Energji Bërthamore, ka ngritur shqetësime lidhur me rrezikun e një bote në të cilën më shumë se 25 shtete mund të kenë armë bërthamore. Ai theksoi se, edhe pse nuk dëshiron të shkaktojë panik, rreziku i një konflikti bërthamor është më i lartë tani se në të kaluarën. Në një intervistë për gazetën italiane La Repubblica, Grossi sugjeroi se në një të ardhme të afërt, numri i vendeve me armë bërthamore mund të arrijë deri në 25, pa specifikuar një afat të caktuar.
Aktualisht, sipas ekspertëve, në botë ka nëntë vende që posedojnë armë bërthamore. Grossi e përshkroi si alarmante bllokimin e procesit të çarmatimit dhe zvogëlimit të kontrolluar të arsenalit bërthamor. Ai theksoi se shtetet që tashmë kanë armë bërthamore po vazhdojnë të prodhojnë më shumë, duke përfshirë edhe Kinën.
Drejtori i agjencisë së Kombeve të Bashkuara shprehu brengosje edhe për rritjen e retorikës rreth sulmeve bërthamore taktike, duke e cilësuar këtë fenomen si të rrezikshëm. Ai gjithashtu vuri në dukje se shumë vende po shprehin interes për blerjen e armëve bërthamore. Sipas një raporti nga Instituti Ndërkombëtar për Kërkime të Paqes në Stokholm, shtetet si India, Pakistani, Koreja e Veriut dhe Izraeli gjithashtu posedojnë armë bërthamore. Këto vende, së bashku, besohet se kanë rreth 12,000 armë bërthamore, ndërsa Shtetet e Bashkuara dhe Rusia mbajnë rreth 10,700 të tilla.
