Një ngjarje tragjike ndodhi mbrëmjen e së shtunës në fshatin Llapashticë të Podujevës, ku një burrë u gjet pa shenja jete pas disa të shtënave me armë zjarri. Policia mori informacion rreth orës 19:30 për të shtëna në atë zonë dhe menjëherë dërgoi ekipet e saj në vendngjarje. Zëdhënësja e policisë, Flora Ahmeti, konfirmoi se në vendin e ngjarjes ishte gjetur një person i pajetë, identiteti i të cilit është më vonë zbuluar si Bashkim Spahiu nga fshati Gllamnik. Sipas burimeve, ai dyshohet se është qëlluar me dhjetë plumba ndërsa ndodhej brenda automjetit të tij. Hetuesit policorë, në bashkëpunim me prokurorin e shtetit, kanë nisur një hetim të plotë për të zbardhur motivet dhe rrethanat e kësaj ngjarjeje të rëndë.
