Një incident i rëndë ka ndodhur paraditen e sotme në shkollën e mesme “Gjergj Kastrioti” në Baz të Matit, ku dy nxënës janë konfliktuar gjatë orës së fizkulturës, duke përdorur mjete prerëse. Si pasojë, një 17-vjeçar ka mbetur i plagosur lehtë.
Menjëherë pas ngjarjes, në vendngjarje kanë mbërritur forcat e policisë dhe autoambulanca, të njoftuar nga mësuesit e shkollës. I plagosuri është transportuar në spital për ndihmë mjekësore, ndërsa autori i dyshuar, 18-vjeçari Donald Lepuri, është shoqëruar në Komisariatin e Policisë Mat.
Sipas informacioneve paraprake nga policia, ngjarja ka ndodhur rreth orës 10:30 në ambientin sportiv të shkollës. Dyshohet se konflikti mes dy të rinjve ka ndodhur për motive të dobëta dhe ka përfunduar me përdorimin e një mjeti prerës nga 18-vjeçari D.L., i cili ka goditur 17-vjeçarin.
Falë ndërhyrjes së shpejtë të policisë, autori i dyshuar është ndaluar dhe arma e krimit është sekuestruar si provë materiale. Hetimet e para tregojnë se të dy nxënësit nuk kanë pasur konflikte të mëparshme.
Grupi hetimor, në bashkëpunim me Prokurorinë, po vijon punën për të sqaruar rrethanat dhe dinamikën e plotë të ngjarjes.
