Ndonëse krerët e shtetit, presidentja Osmani dhe kryeministri në detyrë Kurti dhe vartësja e tij Gërvalla vizitën e tyre në Neë York e kanë ndërlidhur me sesionin e 80-të të Asamblesë së Përgjithshme të OKB-së, megjithatë Kosova nuk është anëtare e saj. Kjo sepse Këshilli i Sigurimit i OKB-së nuk e ka dhënë ende miratimin për Kosovën dhe dy nga pesë anëtaret e përhershme të tij, Rusia dhe Kina kanë paralajmëruar përdorimin e vetos. Presidenti i Shqipërisë, Bajram Begaj, në fjalimin e tij në Asamblene e Përgjithshme të Kombeve të Bashkuara në Nju Jork, vuri theksin se Kosova ka dëshmuar me vepra se është një anëtare e përgjegjshme e komunitetit ndërkombëtar, e përkushtuar ndaj stabilitetit dhe vlerave demokratike. “Megjithatë, vendi i Kosovës në këtë Asamble mbetet padrejtësisht bosh. Njohja e pavarësisë së saj dhe mbështetja për anëtarësimin në OKB dhe organizatat e tjera ndërkombëtare është një akt drejtësie ndaj popullit të Kosovës dhe një hap që forcon paqen e sigurinë në Ballkanin Perëndimor”, tha Begaj. Ish-ambasadori Lutfi Bilalli, e ka cilësuar të mirëseardhur lobimin e Shqipërisë për anëtarësimin e Kosovës në OKB. Por ish-ambasadori, Avni Arifi, vlerëson se anëtarësimi i Kosovës në OKB mbetet i pamundur përderisa Rusia dhe Kina, si anëtare të përhershme të Këshillit të Sigurimit me të drejtë vetoje, vazhdojnë ta kundërshtojnë. Pavarësisht se Kosova nuk është anëtare e OKB-së, megjithatë, ka arritur të bëhet pjesë e disa organizatave ndërkombëtare. Në Asamblenë e Përgjithshme Kosova nuk merr pjesë as si anëtare, as si vëzhguese por ajo përfaqësohet në forume të veçanta të OKB-së përmes UNMIK-ut ose përmes partnerëve ndërkombëtarë, por jo me të drejtë vote apo përfaqësim të drejtpërdrejtë. Kosova ka bërë përpjekje të shumta për lobim në drejtim të anëtarësimit në OKB. Që nga shpallja e pavarësisë në vitin 2008, institucionet kosovare kanë punuar për të siguruar njohje të reja shtetërore dhe për të fituar mbështetjen e vendeve anëtare të OKB-së.
