Pikat kryesore
- Ai nënvizoi se integrimi gradual mund të ketë vlerë si instrument vetëm në rast se funksionon si urë drejt anëtarësimit të plotë në BE, dhe jo si një “dhomë pritjeje e përhershme” për vendet që synojnë anëtarësimin.
- Mucunski ritheksoi përkushtimin e Maqedonisë së Veriut për të vijuar me reformat dhe për t’u harmonizuar plotësisht me Politikën e Përbashkët të Jashtme dhe të Sigurisë të BE-së.
- Sipas kryediplomatit maqedonas, integrimi evropian i Ballkanit Perëndimor është një interes i përbashkët strategjik, që ndihmon në rritjen e sigurisë, stabilitetit dhe prosperitetit të Evropës.
Ministri i Punëve të Jashtme dhe Tregtisë së Jashtme i Maqedonisë së Veriut, Timço Mucunski, ka kërkuar që procesi i anëtarësimit të vendeve të Ballkanit Perëndimor në Bashkimin Evropian (BE) të jetë i besueshëm, i parashikueshëm dhe i mbështetur në meritë, transmeton Anadolu. Pas pjesëmarrjes në Forumin e Dubrovnikut, Mucunski shkroi në rrjetin social amerikan X se bisedimet ishin të fokusuara te e ardhmja e zgjerimit të BE-së në Ballkanin Perëndimor, si edhe te perspektiva evropiane e rajonit. Ai nënvizoi se integrimi gradual mund të ketë vlerë si instrument vetëm në rast se funksionon si urë drejt anëtarësimit të plotë në BE, dhe jo si një “dhomë pritjeje e përhershme” për vendet që synojnë anëtarësimin. Mucunski ritheksoi përkushtimin e Maqedonisë së Veriut për të vijuar me reformat dhe për t’u harmonizuar plotësisht me Politikën e Përbashkët të Jashtme dhe të Sigurisë të BE-së. Sipas kryediplomatit maqedonas, integrimi evropian i Ballkanit Perëndimor është një interes i përbashkët strategjik, që ndihmon në rritjen e sigurisë, stabilitetit dhe prosperitetit të Evropës. “Momenti për zgjerimin është këtu. Varet nga të gjithë ne që ta shfrytëzojmë këtë mundësi”, tha Mucunski.
