Lionel Messi, një nga futbollistët më të njohur të të gjitha kohërave, ka realizuar 885 gola gjatë karrierës së tij, por këtë verë ai u përball me një sfidë të veçantë: të zgjidhte vetëm një prej tyre. 38-vjeçari zgjodhi një nga golat më të njohur të fillimeve të tij, duke theksuar rëndësinë e momentit. Edhe pse shumë prisnin që ai të zgjidhte një gol nga finalja e Kupës së Botës 2022 me Argjentinën, Messi e preferoi një moment më të hershëm, kur ai u shpall në skenën ndërkombëtare. “Për shkak të situatës dhe domethënies, ky gol e kurorëzoi një vit të paharrueshëm për mua… ai është më i rëndësishmi nga të gjithë,” tha Messi, duke iu referuar golit të tij me kokë ndaj Manchester United në finalen e Ligës së Kampionëve në Romë në vitin 2009. Kjo zgjedhje e tij lidhet gjithashtu me projektin bamirës “A goal in life”, ku arti i Refik Anadol do ta shndërrojë këtë gol në një vepër artistike. Të ardhurat nga ankandi i kësaj vepre do të shkojnë për bamirësi, sipas informacioneve nga RAC1.
