Presidenti i Shteteve të Bashkuara, Donald Trump, ka dhënë një paralajmërim të fortë ndaj Hamasit, duke e ftuar grupin militant palestinez të pranojë një marrëveshje për lirimin e pengjeve nga Gaza. Në një postim në platformën e tij “Truth Social”, Trump theksoi se "Izraelitët e kanë pranuar kushtet e mia. Është koha që edhe Hamasi të bëjë të njëjtën gjë". Ai e përshkroi këtë si "paralajmërimin e fundit", duke shtuar se ka informuar Hamasin për pasojat që do të vijnë nëse ata nuk pranojnë marrëveshjen.
Sipas raportimeve nga N12 News në Izrael, Trump i ka propozuar Hamasit një armëpushim të ri. Marrëveshja parashikon që Hamasi të lirojë të gjithë 48 pengjet e mbetur në ditën e parë të armëpushimit, në këmbim të lirimit të mijëra të burgosurve palestinezë që ndodhen në burgjet izraelite. Një zyrtar izraelit ka konfirmuar se propozimi i Trump po shqyrtohet me seriozitet, por nuk ka ofruar detaje të mëtejshme mbi përmbajtjen e tij.
