Rikthehet këtë javë në valët e Top Albania Radio formati “Big Brother VIP Radio”, duke sjellë një tjetër mënyrë për të zbuluar prapaskenat dhe dinamikat e Big Brother VIP Albania.
Në studion e improvizuar brenda ambientit të radios, banorët kanë nisur të zhvillojnë intervista mes tyre, duke bërë pyetje direkte dhe shpesh provokuese për zhvillimet në shtëpi. Në panelin e radhës ishin Miri dhe Selin, ndërsa i ftuar special ishte Rogerti.
Gjatë bisedës, Miri i drejtoi Rogertit një pyetje shumë konkrete: cilët janë pesë finalistët që ai sheh në këtë edicion? Edhe pse theksoi se mendon që finalja mund të jetë me katër persona, Rogerti dha listën e tij:
“Miri, Rogert, Selin, Juela, Brikena,” u shpreh ai, duke përfshirë edhe veten në këtë garë finale.
Megjithatë, ajo që tërhoqi më shumë vëmendje ishte deklarata e tij për fituesin potencial. Pa hezitim, Rogerti vlerësoi Miri si më të merituarin për finalen, madje duke e vendosur mbi veten e tij:
“Miri e meriton finalen më shumë sesa të gjithë ne. Ai më ka mbështetur, më ka sjellë qetësinë. Jemi ndoshta dyshja më e fortë në historinë e Big Brotherit,” tha ai.
Kjo deklaratë ka nxitur reagime të menjëhershme, duke forcuar perceptimin për një aleancë të fortë mes dy banorëve dhe duke shtuar diskutimet mbi strategjitë në prag të finales.
Me rikthimin e “BBV Radio”, publiku ka tashmë një dritare të re për të parë më nga afër mendimet reale të banorëve, përtej lojës së përditshme brenda shtëpisë.
