Qeveria miraton kompensimin e kontributeve për bizneset pas rritjes së pagës minimale

Këshilli i Ministrave i Shqipërisë ka miratuar një vendim të ri që parashikon kompensim financiar për kontributet e sigurimeve shoqërore dhe shëndetësore për punëdhënësit që preken nga rritja e pagës minimale në vend.

Sipas vendimit, kompensimi do të jepet çdo muaj për periudhën kontributive nga janari deri në shtator 2026, për subjektet që kanë të punësuar me pagë bruto nga 40 mijë deri në 49 999 lekë.

Si do të funksionojë kompensimi

Masa e kompensimit do të mbulojë 16.7% të kontributeve të punëdhënësit, të llogaritura mbi diferencën midis pagës së deklaruar dhe pagës së re minimale prej 50 mijë lekësh.

Përllogaritja e përfitimit do të bëhet duke u bazuar në numrin maksimal të punonjësve në këtë fashë page, sipas listëpagesës së deklaruar në organet tatimore për muajin shtator 2025.

Kushtet për të përfituar

Subjektet që kërkojnë të përfitojnë nga kjo skemë duhet të plotësojnë disa kritere kryesore:

Të ushtrojnë aktivitet në sektorë të ndryshëm ekonomikë.

Të mos jenë në pronësi shtetërore apo ente publike.

Të mos kenë detyrime të papaguara për kontributet e sigurimeve shoqërore dhe shëndetësore në momentin e aplikimit.

Si bëhet aplikimi

Aplikimi për kompensimin do të kryhet online përmes portalit e-Albania, duke filluar nga 1 prilli 2026 deri më 31 tetor 2026.

Verifikimi i kërkesave do të bëhet përmes sistemeve elektronike, ndërsa pagesat do të realizohen nga Agjencia Kombëtare e Punësimit dhe Aftësive, përmes drejtorive rajonale. Pagesa do të kryhet brenda 10 ditëve të para të çdo muaji, për kërkesat e muajit paraardhës.

Financimi i skemës

Efekti financiar i këtij vendimi do të mbulohet nga buxheti i shtetit për vitin 2026, në kuadër të programit “Tregu i punës” të Ministrisë së Ekonomisë dhe Inovacionit.

Vendimi do të hyjë në fuqi pas botimit në Fletoren Zyrtare.