Marrëdhënia komplekse mes Mateo dhe Brikena vijon të mbetet një nga dinamikat më të komentuara në shtëpinë e Big Brother VIP Albania.
Për të hedhur më shumë dritë mbi sjelljen e Mateos, ka folur së fundmi miku i tij, Xhani Demika, i njohur ndryshe si “menaxheri i VIP-ave”. I ftuar në emisionin Breaking News, ai ndau disa detaje nga jeta personale e banorit.
Xhani mohoi kategorikisht zërat se Mateo mund të ketë lënë pezull një lidhje jashtë, duke theksuar se ai ka hyrë në shtëpi si beqar. Megjithatë, ai zbuloi se Mateo vjen nga një marrëdhënie e mëparshme që i ka lënë një zhgënjim të fortë, çka sipas tij reflektohet edhe në mënyrën si ai sillet sot me Brikena.
“Siç është me Brikenën, ashtu është natyra e Mateos. Është shumë i dhënë dhe i sinqertë,” u shpreh Xhani Demika, duke nënvizuar ndjeshmërinë e mikut të tij.
Megjithatë, pavarësisht këtij vlerësimi, ai nuk e fshehu pakënaqësinë për rrjedhën e situatës në lojë. Në një këshillë të drejtpërdrejtë, Xhani sugjeroi që Mateo të tërhiqet, duke qenë se Brikena ia ka bërë të qartë vazhdimisht qëndrimin e saj refuzues.
Sipas tij, vazhdimi i kësaj dinamike nuk i shërben askujt tjetër përveç Brikenës, e cila mund ta përdorë këtë afrimitet si strategji loje, duke e mbajtur Mateon në një pozicion më të dobët brenda shtëpisë së Big Brother VIP Albania.
