Pikat kryesore
- Vendimi për ta ndëshkuar me karton të kuq Folarin Balogun në fitoren e Shteteve të Bashkuara të Amerikës ndaj Bosnjë dhe Hercegovinës vijon të mbetet një nga temat më të diskutuara në Botërorin 2026.
- Në sfidën e fazës së 1/16 së finales, sulmuesi amerikan shënoi golin e parë në suksesin 2-0, por më vonë u largua nga loja pas një ndërhyrjeje ndaj mbrojtësit Tarik Muharemovic.
- Fillimisht, arbitri brazilian Raphael Claus nuk e konstatoi rastin, por pasi u njoftua nga VAR-i dhe pa përsëritjet, vendosi t’i tregojë Balogunit kartonin e kuq.
Vendimi për ta ndëshkuar me karton të kuq Folarin Balogun në fitoren e Shteteve të Bashkuara të Amerikës ndaj Bosnjë dhe Hercegovinës vijon të mbetet një nga temat më të diskutuara në Botërorin 2026. Në sfidën e fazës së 1/16 së finales, sulmuesi amerikan shënoi golin e parë në suksesin 2-0, por më vonë u largua nga loja pas një ndërhyrjeje ndaj mbrojtësit Tarik Muharemovic. Fillimisht, arbitri brazilian Raphael Claus nuk e konstatoi rastin, por pasi u njoftua nga VAR-i dhe pa përsëritjet, vendosi t’i tregojë Balogunit kartonin e kuq. Ky vendim solli reagime të shumta, ndërsa trajneri i SHBA-së, Mauricio Pochettino, këmbënguli se ai aksion nuk justifikonte përjashtimin nga ndeshja. Në diskutim është përfshirë edhe ish-gjyqtari i FIFA-s, Mark Halsey, i cili e krahasoi këtë episod me ndërhyrjen e Lionel Messit ndaj Aissa Mandit në takimin Argjentinë-Algjeri, ku futbollisti argjentinas nuk u ndëshkua as me karton të verdhë. Sipas Halseyt, rasti i Messit ishte më i rëndë se ai i Balogunit dhe duhej të ishte shqyrtuar nga VAR-i. “Nëse kthehemi te ndeshja Argjentinë-Algjeri, ishte ndërhyrja e Messit. Në atë rast, Messi nuk kishte asnjë mundësi për të luajtur topin dhe ishte një ndërhyrje e dobët. Ai i kalon takat në pjesën e pasme të pulpës së lojtarit algjerian”. “Për mua, ajo ndërhyrje ishte shumë më e rëndë se ajo që pamë nga Balogun. VAR-i duhej të rekomandonte një rishikim, sepse ishte një gabim i qartë dhe i dukshëm i gjyqtarit të ndeshjes”, deklaroi Halsey. Ndërkohë, Balogun do të mungojë në ndeshjen e fazës së 1/8 së finales kundër Belgjikës për shkak të pezullimit, ndërsa FIFA mund t’ia zgjasë dënimin nëse komisioni disiplinor arrin në përfundimin se ndërhyrja meriton më shumë se një ndeshje pezullim.
