Pikat kryesore
- Rritja e çmimeve të fruta-perimeve ka sjellë boshatisjen e “Markatës së Shijes” në qytetin e Korçës.
- Ndryshe nga ditët e zakonshme, në këtë treg tashmë shihen kryesisht tregtarët e vegjël që ofrojnë produkte bujqësore, ndërsa blerësit janë gjithnjë e më të paktë.
- Sipas qytetarëve, rritja e çmimeve ka ndikuar drejtpërdrejt në fuqinë blerëse, duke mbajtur larg tregut sidomos pensionistët, të cilët e kanë të pamundur të përballojnë kostot e rritura të produkteve bazë ushqimore.
Rritja e ndjeshme e çmimeve të fruta-perimeve ka sjellë një rënie të dukshme të frekuentimit në “Markatën e Shijes” në qytetin e Korçës, duke e kthyer një nga tregjet më të njohura të zonës në një hapësirë pothuajse të boshatisur. Ndryshe nga ditët e zakonshme, sot në treg dominojnë kryesisht tregtarët e vegjël, ndërsa prania e blerësve është reduktuar ndjeshëm.
Sipas qytetarëve, shkaku kryesor është rënia e fuqisë blerëse si pasojë e rritjes së çmimeve. Më të prekurit janë pensionistët, të cilët e kanë gjithnjë e më të vështirë të përballojnë kostot e produkteve bazë ushqimore. Ata shprehen se janë detyruar të kufizojnë ndjeshëm blerjet, duke zgjedhur vetëm produktet më të lira dhe duke hequr dorë nga shumë artikuj të përditshëm.
“Me këto çmime nuk përballohet më. Marrim vetëm ato më të lirat dhe shumë gjëra i kemi hequr fare,” shprehet një qytetar.
Edhe tregtarët konfirmojnë të njëjtën situatë, duke theksuar se ulja e shitjeve lidhet drejtpërdrejt me rritjen e çmimeve që nga burimi i furnizimit. Sipas tyre, edhe pse produkti është cilësor dhe i bollshëm, mungesa e kërkesës po i penalizon rëndë.
“Mall të mirë ka, por nuk blihet. Njerëzit marrin vetëm më të lirën, edhe pse cilësia nuk është e njëjtë,” u shpreh një tregtar.
Të dhënat tregojnë një rritje të menjëhershme të çmimeve brenda një jave. Domatet nga 250 lekë për kilogram kanë arritur në 350 lekë, ndërsa specat nga 200 lekë kanë shkuar në 300 lekë për kilogram. Rritje kanë pësuar edhe produkte të tjera si fasulet, limoni, sallata dhe trangulli, me diferenca nga 50 deri në 100 lekë.
Kjo situatë nuk ka prekur vetëm tregun e hapur, por edhe supermarketet dhe marketet në qytet, të cilat po përballen me rënie të shitjeve. Rritja e çmimeve të produkteve të shportës po reflekton drejtpërdrejt në konsumin e përditshëm, duke sinjalizuar një ngadalësim të përgjithshëm të kërkesës në tregun vendas.
