Projektligji për Sinjalizuesit: Mbrojtje e re për denoncuesit

Qeveria shqiptare ka filluar procesin e ndryshimit të ligjit për sinjalizuesit, duke e përshtatur atë me standardet e Bashkimit Evropian. Pas një dekade që nga miratimi i ligjit aktual, ky akt normativ nuk ka arritur të krijojë një mekanizëm efektiv për të luftuar korrupsionin në administratën publike. Këshilli i Ministrave ka publikuar një projektligj të ri për “sinjalizimin dhe mbrojtjen e sinjalizuesve”, i cili synon të adresojë mangësitë e evidentuara gjatë zbatimit të ligjit të mëparshëm.

Që nga hyrja në fuqi e ligjit në vitin 2016, numri i sinjalizimeve nga sektori publik ka qenë shumë i ulët, krahasuar me ata në sektorin privat. Dokumenti shoqërues i nismës sugjeron se drafti është i bazuar në një analizë të Drejtorisë së Përgjithshme të Antikorrupsionit dhe ofron një qasje të re dhe gjithëpërfshirëse për trajtimin e sinjalizimeve, duke përmirësuar mekanizmat ekzistues.

Ligji i ri do të mbështesë punonjësit e sektorit publik dhe privat që kanë informacione mbi shkelje ligjore dhe raste korruptive, duke garantuar ruajtjen e konfidencialitetit dhe mbrojtjen nga hakmarrja. Ndryshe nga ligji aktual, drafti i ri parashikon mbrojtje edhe për ata që zgjedhin të denoncojnë nëpërmjet mediave.

Nisma gjithashtu do të zgjasë rrugët e sinjalizimit, duke lejuar që denoncimet të bëhen në njësitë e posaçme të krijuara brenda institucioneve, si dhe në Inspektoriatin e Lartë të Deklarimit dhe Kontrollit të Pasurive. Sipas relacionit, dispozitat e reja do të forcojnë mbrojtjen e sinjalizuesve dhe do të përfshijnë edhe individë të tjerë që ndihmojnë në procesin e sinjalizimit.

Megjithatë, ligji do të ketë kufizime në mbrojtjen e denoncuesve në rastet që lidhen me sigurinë kombëtare, informacionin e klasifikuar dhe sekretet profesionale. Qeveria thekson se ky draft është në përputhje me legjislacionin e BE-së dhe është një pjesë e rëndësishme e masave për luftimin e korrupsionit që përfshihen në kapitullin e parë të negociatave.