Pikat kryesore
- Sipas të dhënave që ka konsultuar redaksia nga publikimi hakerave, dosja e 27 në radhë mban pikërisht të dhëna mbi aplikimet për kredi në sportelet e Posta Shqiptare me emrin “Komunikim mbi aplikim për kredi…”.
- Rasti bëhet edhe më i ndjeshëm në sfondin e një skandali të mëparshëm që lidhej me IUTE Credit, ku një person kishte mashtruar dhjetëra gra në Lezhë dhe Shkodër duke përdorur aplikacionin MyIUTE.
- Problemi në Lezhë dhe Shkodër nxori në pah probleme serioze në verifikimin e kredimarrësve dhe në mënyrën e funksionimit të aplikacionit.
Një situatë shqetësuese dhe me pasoja potencialisht serioze për sigurinë e të dhënave personale është duke u zhvilluar rreth Postës Shqiptare, duke ngritur pikëpyetje të forta mbi mënyrën se si administrohen informacionet sensitive të qytetarëve.
Pak javë më parë, u raportua një rast i pazakontë, ku Posta Shqiptare publikoi në faqen e saj zyrtare në Facebook një njoftim për pranimin e aplikimeve për kredi në emër të kompanisë IUTE Credit. Ky veprim u interpretua si një përfshirje direkte e një institucioni publik në ndërmjetësimin e kredive me interesa të larta, duke u sjellë praktikisht si një kanal shpërndarjeje për këtë kompani financiare.
Menjëherë pas publikimit të këtij denoncimi, postimi u fshi, por burime të sigurta konfirmojnë se aktiviteti i pranimit të aplikimeve për kredi në sportelet e Postës Shqiptare ka vijuar pa ndërprerje.
Situata është përshkallëzuar më tej gjatë ditës së sotme, pasi grupi i hakerave “Homeland Justice” ka deklaruar se ka ndërmarrë një sulm ndaj databazës së Postës Shqiptare, duke pretenduar se ka arritur të marrë nën kontroll të plotë të dhënat e institucionit.
Posta Shqiptare nuk merret vetëm me shpërndarjen e pakove dhe dokumenteve, por administron edhe të dhëna shumë sensitive, përfshirë informacion mbi pensionet e qytetarëve. Për më tepër, bazuar në vetë deklarimet e institucionit dhe aktivitetin e tij të fundit, ajo disponon edhe të dhëna që lidhen me aplikimet për kredi të kryera në bashkëpunim me IUTE Credit.
Sipas materialeve të publikuara nga hakerat, një ndër dosjet e ekspozuara – konkretisht dosja me numër 27 – përmban të dhëna mbi aplikimet për kredi të realizuara në sportelet e Postës Shqiptare, me përshkrimin “Komunikim mbi aplikim për kredi…”. Ky detaj shton ndjeshëm shqetësimet se në duart e palëve të paautorizuara mund të kenë përfunduar të dhëna personale dhe financiare të qytetarëve.
Nëse këto pretendime konfirmohen, rreziku është real dhe i lartë: bëhet fjalë për informacion që mund të përfshijë identitetin, të dhënat e kontaktit, dhe potencialisht edhe detaje mbi llogaritë apo historikun financiar të individëve.
Rasti bëhet edhe më i ndjeshëm duke pasur parasysh një skandal të mëparshëm të lidhur me IUTE Credit, ku një individ kishte arritur të mashtrojë dhjetëra gra në Lezhë dhe Shkodër përmes aplikacionit MyIUTE. Ai rast nxori në pah dobësi serioze në verifikimin e identitetit dhe në mekanizmat e sigurisë së sistemit.
Në këtë kontekst, zhvillimet e fundit jo vetëm që rrisin shqetësimin publik, por kërkojnë edhe reagim të menjëhershëm nga institucionet përgjegjëse për mbrojtjen e të dhënave dhe sigurinë kibernetike.
Pyetja kryesore mbetet: a janë të sigurta të dhënat e qytetarëve shqiptarë në institucionet publike?
